भदौ १०, जुम्ला । लगानी प्रवर्द्धनका लागि जुम्लामा पहिलो पटक स्थानीय तहमा सम्मेलन आयोजना हुने भएको छ । जुम्लाको चन्दननाथ नगरपालिकाको पहलमा भदौ २९ गते शुक्रवार लगानी प्रवर्द्धन सम्मेलन आयोजना गर्न लागिएको हो ।
चन्दननाथ नगरपालिकाका मेयर कान्तिका सेजुवालले आइतवार जारी गरेको विज्ञप्तिमा चन्दननाथ नगरपालिकाको अग्रसरतामा लगानी सम्मेलन आयोजना गर्न लागिएको भए पनि यसले समग्र कर्णाली प्रदेशको विकास र अग्रगमनको लक्ष्य लिएको उल्लेख गरेको छ । विज्ञप्तिमा भनिएको छ, ‘कर्णाली प्राविधिक शिक्षालयमा एक दिने लगानी सम्मेलन आयोजना गर्न लागेका छौं, भौतिक विकास र मानव विकासका दृष्टिले पिछडीएको कर्णालीमा हुने यो लगानी सम्मेलनले ठूलो अर्थ बोकेको छ ।’
सम्मेलनमा सङ्घीय अर्थमन्त्री डा. युवराज खतिवडा, राष्ट्रिय योजना आयोगका उपाध्यक्ष डा. पुष्प कँडेल, सदस्य मीनबहादुर शाहीलगायतको विशेष सम्बोधन रहने नगरपालिकाले जानकारी गराएको छ । लगानी प्रवर्द्धन सम्मेलनमा देशका प्रतिष्ठीत उद्योगी व्यवसायीहरु, नेपाल सरकारका उच्चपदस्थ अधिकारीहरु, नेपाल स्थित कुटनीतिक नियोग तथा दातृ निकायका प्रतिनिधिहरु, बैङ्क तथा वित्तीय संस्थाका प्रतिनिधिहरु सहभागी हुनेछन् ।
सम्मेलनका क्रममा जुम्लामा रहेका लगानीका अवसरका क्रममा छलफल हुनेछ भने स्थानीय विज्ञहरुले कृषि, पर्यटन तथा गैरवन पैदावार (जडिबुटी)का सम्भावनाका सम्बन्धमा छुट्टाछुट्टै कार्यपत्र प्रस्तुत गर्ने बताइएको छ । लगानी गर्न इच्छुकहरुले सम्मेलनका क्रममा लगानी सम्भवनाका आधारभूत सर्वेक्षण समेत गर्ने र यो सम्मेलनले चन्दननाथ नगरपालिका, जुम्ला जिल्ला र समग्र कर्णालीमा लगानी भित्र्याउन महत्वपूर्ण भूमिका खेल्ने विश्वास नगरपालिकाले लिएको छ ।
