प्रकाशकीय

आर्थिक अभियान दैनिक आजदेखि १३ वर्ष पूरा गरी चौधौं वर्षमा प्रवेश गरेको छ । सकारात्मक दृष्टिकोणका साथ आमपाठकमा सही सूचना सम्प्रेषण गर्नुलाई हामीले आफ्नो प्रमुख दायित्व ठानेका छौं । एउटा जिम्मेवार र विश्वासिलो आर्थिक राष्ट्रिय दैनिक पत्रिकाका रूपमा हामीले प्रकाशित गर्दै आएका समाचार, दृष्टिकोण र विश्लेषणहरू हाम्रा सेवाग्राही वर्ग अर्थात् उद्योग–व्यवसाय, विभिन्न पेशाकर्मी र लगानीकर्ताको उन्नतिमा सहयोगी होऊन् भन्ने दृष्टिकोण हाम्रो छ । हामी यसका लागि पत्रकारिताका विश्वस्तरीय मापदण्डहरू पालना गर्छौं ।

२०४६ पछि नेपालले अवलम्बन गरेको खुलाबजार अर्थतन्त्रलाई टेवा पुर्‍याउन निजीक्षेत्रलाई प्रोत्साहन गर्दै तिनका समस्या राज्यको आधिकारिक निकायसम्म पुर्‍याउन १३ वर्षअगाडि साप्ताहिक पत्रिकामार्फत शुरू भएको हाम्रो प्रयास विगत ८ वर्षदेखि दैनिक पत्रिकाका रूपमा पनि जारी नै छ ।

यस अवधिमा मुलुकमा ठूला परिवर्तन भएका छन् । गतवर्ष तीनै चरणको निर्वाचन सम्पन्न भएसँगै सङ्घीय लोकतान्त्रिक गणतन्त्र कार्यान्वयनमा आएको छ । ७ सय ५३ स्थानीय तह, ७ प्रदेश र सङ्घमा जननिर्वाचित सरकार गठन भएका छन् । विकास र समृद्धिको बाधकका रूपमा लिइएको नेपालको अस्थिर राजनीति र सरकार परिवर्तनको खेल निर्वाचनपछि रोकिने आशा छ । ५ वर्षका लागि स्थायी सरकार गठन भएकाले देशको नीति निर्माण र स्वदेशी विदेशी लगानीको वातावरण बनाई दिगो आर्थिक विकासको चरणमा देशलाई लैजानु आवश्यक छ । ‘सुखी नेपाली, समृद्ध नेपाल’बनाउने सरकारको अभियानमा आर्थिक अभियान दैनिकले पनि देशको विकास र आर्थिक उन्नतिका लागि सहयोग पुग्ने खालका सामग्री पाठकसामु ल्याउने अभियान जारी राख्नेछ । चौधौं वर्ष प्रवेशको यस अवसरमा हामी, हामीलाई प्रत्यक्ष तथा परोक्ष रूपमा सहयोग गर्नुहुने हाम्रा आदरणीय पाठक, लेखक, विज्ञापनदाता, व्यावसायिक सेवाप्रदायकहरूका साथै सबै शुभेच्छुकप्रति हार्दिक कृतज्ञता ज्ञापन गर्दछौं । साथै, यस्तै सहयोग आगामी दिनहरूमा पनि पाइरहने विश्वास व्यक्त गर्दछौं ।

मदन लम्साल
अध्यक्ष, न्यू बिजनेश एज प्रालि