सानो लगानीलाई प्रोत्साहन गर्ने अवधारणा हो

इच्छाराज तामाङ,
अध्यक्ष,
सिभिल समूह

भर्खरै बुकिङ खुला भएको सिभिल ट्रेड सेण्टरका विषयमा सिभिल समूहका अध्यक्ष इच्छाराज तामाङसँग आर्थिक अभियानले गरेको कुराकानी :

नयाँ अवधारणाको शपिङ सेण्टर बनाउने सोच कसरी आयो ?

अहिले काठमाडौं जनसङ्ख्याको हिसाबले पनि धेरै ठूलो भइसकेको छ । यति ठूलो शहरमा अहिले पनि परम्परागत पसलहरू राख्ने ठाउँको अभाव छ । सामान खरीद गर्नेलाई धेरै ठाउँ डुल्ने झन्झट हुन्छ । यसका अतिरिक्त ट्राफिक जाम पनि हुने गर्दछ । उपभोक्ताको किनमेल आरामदायी हुँदैन । त्यसैले धेरै ठाउँमा समानहरू खोज्दै हिँड्ने झन्झट हटाउन योजना ल्याइएको हो ।

सुविधाहरू के–के छन् ?

मलभित्र सिनेमा हल, थिएटर, गोष्ठी, रेष्टुराँ, पार्टीलगायतका लागि पर्याप्त ठाउँ आवश्यक पर्छ । बालबालिकाका लागि खेल्ने ठाउँ पनि चाहिन्छ । त्यो सम्पूर्ण सुविधा मलमा हुन्छ । मलमा एकैपटक ३ हजार जनाले सामान किन्न सक्छन् । एउटै महलभित्र सबै सामग्री पाउने सुविधा हुन्छ । यहाँ पार्किङको सुविधा हुन्छ । यसले उपभोक्ताको समयको बचत हुनुका साथै उसले मनोरञ्जन गर्ने अवसर पनि पाउँछन् । यो मलमा दुईओटा पार्किङ छन्, जसमा ४ सय गाडी र ५ सय जति मोटरसाइकल पर्किङ गर्न सकिन्छ । भुँइ तलादेखि चार तलासम्म पसल राख्न सकिने शपिङ युनिट छन् । पाँच तलादेखि सात तलासम्स अफिस युनिट राखेका छौं । त्यसपछि दुई तलासम्म हल, एक तलामा बच्चाका लागि खेल्ने ठाउँ, १ हजार जना अट्ने रुफटप रेष्टुराँ र ३ सय अटाउने रिभल्विङ रेष्टुराँ छन् ।

अन्य मलमा भन्दा यसमा फरक के छ ?

यो मल शहरको केन्द्रमा छ । युनाइटेड वल्र्ड ट्रेड सेण्टर, काठमाडौं मल र सिभिल मलभन्दा पनि अति उपयुक्त ठाउँमा छ । हामीले ‘हेली प्याड’सम्म राखेका छौ । भोलि कुनै पनि नयाँ पुस्ताका व्यापारीहरू हेलिकोप्टर लिएर बैठकमा सामेल हुन सक्दछन् । भोलिको पुस्तालाई हेरेर हामीले यो अवधारणा ल्याएका हौ ।

तपाईहरूको अवधारणामा नयाँ कुरा के छ ?

के गर्दा लगानीकर्ताको पैसा सुरक्षित हुन्छ ? लगानी सुरक्षाका साथसाथै प्रतिफल कसरी दिन सकिन्छ ? यी कुराहरूलाई ख्याल गर्दै २ वर्षको अनुसन्धानपछि हामीले यस्तो अवधारणा ल्याएका हौ । यस मलमा सक्नेले आफै किनेर पनि पसल चलाउन सक्छ । हामीले ५ वर्षपछि भाडा फिर्ताको सुनिश्चितता दिएका छौ । त्यो भन्दा राम्रो मूल्यमा भाडा लगाउन पनि सकिन्छ ।

स्वामित्व हस्तान्तरणको कुरा पनि छ नि ?

मलमा स्वामित्व पाउने व्यवस्था यसअघि कसैले ल्याएको थिएन । हामीले सानो लगानीलाई प्रोत्साहन दिन यस्तो अवधारणा ल्याएका हौ । यो उनीहरूका लागि लगानीको ठूलो अवसर हो । त्यसैले हामीले एक युगमा एकपटक मात्र यो अवसर आउँछ भनेका हौ ।

‘सुनमा सुगन्ध’ भनेको के हो ?

पहिला जो आउँछ उनीहरूलाई सुनको सिक्का र १ सय ५१ जना मध्येबाट एक जनालाई ल्याण्डरोभर गाडी पाउने अवसर छ । जसले किनेको छ, त्यसले सुनजस्तै अमूल्य वस्तु पाएको हुनाले सुनमा सुगन्ध भनेका हौ ।