लगानी

२०७४-०६-२६ मा प्रकाशित     २२५८ पटक पढिएको    ० बिचार / प्रतिक्रिया

नेपाल बैङ्क लिमिटेड : कम्पनी विश्लेषण (बिहीवार, २६ असोज २०७४)

प्रमुख गतिविधि
यसअघि गत आर्थिक वर्ष २३ दशमलव ७४ प्रतिशत हकप्रद विक्री गरी राष्ट्र बैङ्कले तोकेको न्यूनतम चुक्ता पूँजी ८ अर्ब पुर्‍याएको छ । गत चौथो त्रैमाससम्म धेरै खुद मुनाफा आर्जन गर्ने बैङ्कमध्ये यो बैङ्क दोस्रो नम्बरमा रहन सफल भएको छ । कम्पनीले आफ्नो वित्तीय अवस्था थप मजबूत बनाउन आफ्नो नाममा रहेको नागरिक लगानी कोष र डिप्रेक्स लघुवित्तको शेयर विक्रीमा राखेको छ ।

कम्पनीले सार्वजनिक गरेको गत आर्थिक वर्षको चौथो त्रैमासिक वित्तीय विवरणअनुसार आर्थिक वर्ष २०७३/७४ र २०७२/७३ बीच तुलना गर्दा :

  • बैङ्कले यो अवधिमा आफ्नो खुद नाफामा १२ प्रतिशतको वृद्धि हासिल गरेको छ । कम्पनी यो वर्ष ३ अर्ब २१ करोड ९५ लाख रुपैयाँ खुद मुनाफा कमाउन सफल भएको छ । अघिल्लो आर्थिक वर्षमा उसले २ अर्ब ८८ करोड २९ लाख रुपैयाँ खुद नाफा कमाएको थियो ।
  • पूँजी वृद्धिसँगै प्रतिशेयर आम्दानी थोरै घट्न पुगेको छ । यो अवधिमा पूँजी २४ प्रतिशत वृद्धि भएकोे छ भने प्रतिशेयर आम्दानी १० प्रतिशत घटेको छ ।
  • गतवर्षको मुनाफा र सम्पत्ति एवम् अन्य कम्पनीका शेयर बेचेर आउने गैरसञ्चालन नाफाका कारण बैङ्कको जगेडा कोषमा १३१० प्रतिशत वृद्धि भएको छ । अघिल्लो साल २४ करोड ८९ लाख रहेको जगेडा कोषमा हाल ३ अर्ब ५१ करोड रुपैयाँ सञ्चित छ ।
  • निक्षेप र कर्जाको कुरा गर्दा उसले यो त्रैमासमा ९३ अर्ब ९४ करोड निक्षेप उठाई ७४ अर्ब ३७ करोड कर्जा प्रवाह गरेको छ ।
  • निक्षेप ५ प्रतिशत वृद्धि भएको छ भने कर्जा प्रवाह १७ प्रतिशत वृद्धि भएको छ ।
  • खुद ब्याज आम्दानी २७ प्रतिशत वृद्धि भएर ५ अर्ब ८३ करोड करोड पुगेको छ । त्यस्तै, सञ्चालन नाफा ६५ प्रतिशत वृद्धि भएर ३ अर्ब २० करोड पुगेको छ । जोखीम कोषबाट २५ करोड १३ लाख रुपैयाँ फिर्ता भएको देखिन्छ ।
  • बैङ्कको निस्क्रिय कर्जा थोरै मात्रामा वृद्धि भएर ३ दशमलव १७ प्रतिशत छ ।
  • बैङ्कले प्रकाशन गरेको वित्तीय विवरणअनुसार बैङ्कको प्रतिशेयर आम्दानी ४० दशमलव ३ रुपैयाँ, मूल्य आम्दानीको अनुपात ९ दशमलव ९ गुणा, प्रतिशेयर नेटवर्थ १ सय ४३ दशमलव ६५ रुपैयाँ र तरलता अनुपात २९ दशमलव ८९ प्रतिशत छ ।

निष्कर्ष
समीक्षा अवधिमा बैङ्कको सबै सूचक राम्रा हुँदै गएको पाइन्छ । खुद ब्याज आम्दानी, सञ्चालन मुनाफा, कर्जा विस्तारमा गरेको वृद्धि, कोषको लागत १.९७ प्रतिशत मात्र हुनु र सम्पत्ति र शेयर बेचेर आउने गैरसञ्चालन नाफालाई सीमित राखेर पनि खुद मुनाफा बढाउन सक्नु बैङ्कको राम्रा पक्षहरू हुन् । साथै, मूल्य आम्दानी अनुपात ९ दशमलव २३ प्रतिशत र इक्विटीमा प्रतिफलको अनुपात ४६ दशमलव ५२ हेर्ने हो भने पनि दीर्घकालीन लगानीका लागि यो निकै आकर्षक पक्ष भए तापनि कर्मचारी र सञ्चालन खर्च घटाएर भविष्यमा नाफा बढाउँदै लैजानु चुनौतीपूर्ण नै देखिन्छ ।

प्राविधिक विश्लेषण : ३ सय ४० को टेवा नजीक नेपाल बैङ्क लिमिटेड

प्रतिरोध २ : ३९० । प्रतिरोध १ : ३६५ । हालको अन्तिम बिन्दु : ३४३ । टेवा १ : ३२७ । टेवा २ : ३१०

बजारको अवस्था
करीब २ महीनायता नेपाल बैङ्कको शेयरमूल्य प्रवृत्तिहीन अवस्थामा छ । हालको अवस्थामा ३ सय ४० रुपैयाँको मजबूत टेवा परीक्षण गर्ने क्रममा छ । बुधवार बैङ्कको शेयरमूल्य २ रुपैयाँ अर्थात् शून्य दशमलव ५९ प्रतिशत बढेर ३ सय ४३ रुपैयाँमा बन्द भएको छ भने यस १४ हजार ६ सय १५ कित्ता शेयर कारोबार भएको छ ।

मुभिङ एभरेज
६ दिने र २१ दिने मुभिङ एभरेजअनुसार यस बैङ्कको शेयरमूल्य घट्दो प्रवृत्तिमा छ । ६ दिने मुभिङ एभरेज ३१ दिने मुभिङ एभरेजभन्दा तल रहनुले यस बैङ्कको शेयरमूल्य तत्काल बढ्ने सङ्केत नरहेको बुझाउँछ ।

एडीएक्स
एडीएक्स सूचकबमोजिम यस बैङ्कको शेयरमूल्य प्रवृत्तिहीन अवस्थामा रहेको सङ्केत गर्छ ।

एटीआर
एटीआर सूचक घट्दो प्रवृत्तिमा रहेको हुनाले नेपाल बैङ्कको शेयरमूल्यमा उतारचढाव घट्दै गएको बुझाउँछ ।

स्टोकास्टिक
स्टोकास्टिक सूचकअनुसार नेपाल बैङ्कको शेयरमूल्यमा विक्रेताको चाप बढिरहेको सङ्केत पाइन्छ ।

निष्कर्ष
विभिन्न प्राविधिक सूचकहरूले नेपाल बैङ्कको शेयरमूल्य घट्दो प्रवृत्तिमा रहेको बुझाए पनि हालको अवस्थामा टेवा नजीक रहेको हुनाले ‘पर्ख र हेर’को अवस्था रहेको देखिन्छ ।


#  
कुनै पनि बिचार / प्रतिक्रिया छैन ।
http://nepallife.com.np/
Kalash Cement
http://www.keyalgroup.org
http://www.keyalgroup.org
Trisakti Cement

नयाँ अपडेट

फोटो फिचर

तीतो मीठो

चुनावी नशामा लठ्ठ जनता
चुनाव साँच्चिकै लाग्यो त देशमा । तीव्र राजनीतिक ध्रुवीकरणका कारण पनि चुनावले सबैजसो नेपालीलाई नशा लागेजसरी समातेको छ । अझ वाम र काङको जुहारीले पनि रमाइलो मेला मन पराउने . . . विस्तृतमा »