विविध

२०७३-१२-७ मा प्रकाशित     ३०८ पटक पढिएको    ० बिचार / प्रतिक्रिया

चैत ६, म्याग्दी । म्याग्दीमा नेपाली कागज उत्पादनमा नयाँ प्रविधिको प्रयोग भएको छ । न्यानो घरमा कागज सुकाउने प्रविधिको प्रयोग भएपछि कागज उत्पादनमा नियमितताका साथै उत्पादन क्षमता वृद्धि भएको छ ।

अन्नपूर्ण गाउँपालिकाको नाङ्गीमा रहेको हिमाञ्चल हाते कागज तथा हस्तकला उद्योगमा नयाँ प्रविधिको प्रयोग गरी कागज उत्पादन गर्न थालिएको हो । बन्द कोठामा तातो बनाएर कागज सुकाउन छुट्टै न्यानो घर बनाइएको छ । हाल नेपालका प्रायः नेपाली कागज उद्योगले लोक्ता प्रशोधन गरेपछिको लेदोलाई कागज बनाउन घाममा सुकाउने गर्दै आएका छन् । दक्षिण कोरियाको कोरियन इन्ष्टिच्युट अफ साइन्स एण्ड टेक्नोलोजीअन्तर्गतको इञ्जिनीयर्स विथ ब्रोदर समूहको सहयोगमा यस्तो प्रविधिको प्रयोग गरिएको हो ।

होचो गरी बनाइएको भुइँतलामा आगो बालेर कोठालाई तातो बनाउने र त्यही कागज सुकाउने गरिएको छ । भवनको एकातर्फबाट कोठामा प्रकाश पार्न सिसा राखिएको छ भने सिसा राखिएको भन्दा विपरीत भागबाट कोठालाई न्यानो बनाउन ताप प्रसारण गराउने व्यवस्था गरिएको छ । घाममा कागज सुकाउँदा झरी, वर्षा र मौसम बदली हुँदा उत्पादन गर्न सकिएको थिएन भने उत्पादित कागजसमेत सुकाउने क्रममा वर्षाले भिजेर क्षति हुने समस्या थियो । यसैगरी, उक्त उद्योगमा उत्पादित नेपाली कागजबाट निर्मित डायरी विदेशमा निर्यात हुन थालेको छ । नेपाली कागजबाट निर्मित डायरी बलियो र टिकाउ हुने भएकाले दक्षिण कोरिया, अष्टे«लियालगायत देशमा निकासी हुन थालेको हो ।

सामान्य आकारको एउटा डायरीलाई ४ सय २० रुपैयाँका दरले विक्री गरिन्छ । गाउँको जङ्गलमा खेर गइरहेको लोक्ताको सदुपयोग गरी कागज उत्पादन र रोजगारी सृजना गर्ने उद्देश्यले स्थानीय समुदायले वि.सं. २०७० मा उद्योग स्थापना गरेका थिए । बढी मूल्य पाइने र बजारको मागअनुसार नेपाली कागज विक्री नगरी उद्योगमा डायरी उत्पादन गर्न शुरू गरिएको हो । उद्योगमा नाङ्गीका ११ जना महिलाले रोजगारी पाएका छन् ।

उद्योग सञ्चालनका लागि जिल्ला वन कार्यालय, बहुसरोकारवाला वन कार्यक्रम, सङ्गम म्याग्दीलगायत सङ्घसंस्थाले पनि सहयोग गरेका छन् । गैरकाष्ठ वन पैदावारमा आधारित उद्यमलाई प्रोत्साहन गर्ने नीतिअनुसार गतवर्ष उपकरण खरीदका लागि १ लाख रुपैयाँ उपलब्ध गराएको उद्योगमा यस वर्ष पनि थप १ लाख रुपैयाँ अनुदान दिएको जिल्ला वन कार्यालय म्याग्दीले जानकारी दिएको छ ।

उद्योगलाई यस वर्ष बहुसरोकारवाला वन कार्यक्रममार्फत सङ्गम म्याग्दीले पनि कागज काट्ने मेशिन खरीदका लागि १ लाख २० हजार रुपैयाँ सहयोग गरेको बताएको छ । कागज उद्योग स्थापना भएपछि स्थानीय नाङ्गी सामुदायिक वनमा वर्षौंदेखि कुहिएर खेर गइरहेको अर्गेलीको लोक्ता सदुपयोग हुनुका साथै रोजगारी सृजना भई गाउँलेको आर्थिक स्तर सुधार गर्नसमेत मद्दत पुगेको छ ।


#  
कुनै पनि बिचार / प्रतिक्रिया छैन ।
4th NEWBIZ BUSINESS CONCLAVE & AWARDS
http://nepallife.com.np/
Kalash Cement
http://www.keyalgroup.org
http://www.keyalgroup.org

नयाँ अपडेट

फोटो फिचर

तीतो मीठो

मन्त्री अब ‘नायक’ पनि
जबजब नेपालमा उद्योगी व्यापारीले जनतालाई बढी मूल्य लिएर ठगेर पाप कर्म गर्न थाल्छन्, तबतब कृष्ण भगवान् धर्तीमा आएसरि हाम्रा मन्त्री, सरकारी अधिकारीहरु त्यस्ता पापीहरुलाई समाप्त . . . विस्तृतमा »